2025-жылдын 1-апрелинде Нарын райондук мамлекеттик администрациясынын башчысы- аким Н.Мадимаров Миң-Булак айыл өкмөтүнө караштуу Жер-Көчкү, Лахол айылдарынын жана Кара-Жылга калктуу конушунун тургундары менен жолугушуп, жашоочулардын көйгөйүн жеринен укту.
Жер-жерлерле өткөрүлгөн жыйындарга аким менен биргеликте Нарын райондук агрардык өнүктүрүү башкармалыгынын жетекчиси А.Мүсүрканов, Миң-Булак айыл өкмөтүнүн башчысы А.Окенов, Кочкор районунун №14 Жол тейлөө мекемесинин жетекчиси Э.Аманов жана тиешелүү мекеме жетекчилери катышты.
Жолугушууда көтөрүлгөн маселелер:
Таза суу маселеси – калкты таза суу менен камсыздоо; Жайыт көйгөйлөрү – мал чарбачылыгы үчүн жайыттардын абалы; Жол маселеси – ички жолдорду оңдоо жана тейлөө; ФАП (фельдшердик-акушердик пункт) куруу– медициналык тейлөөнү жакшыртуу; Футболдук аянтча куруу– жаштар үчүн спорттук шарттарды түзүү; Мунапыс турак-жайларды мыйзамдаштыруу; Ирригация тармагы; социалдык жөлөк пул; мединица тармагы боюнча (Нарын облустук үй-бүлөлүк дарыгерлер борбору жеринде элдерге медициналык тейлөө көрсөтүү).Эл менен жолугушууда район акими урматтуу Президентибиз Садыр Нургожоевичтин жүргүзүп жаткан саясаты, аймактарды өнүктүрүү боюнча көрүп жаткан камкордугу чоң өзгөрүүлөргө алып келип жаткандыгын белгиледи.
Ал эми жеринде көтөрүлгөн маселелер боюнча мекемелер жана айыл өкмөт менен биргеликте иш алып баруу жагы белгиленип, айрым маселелерди чечүүдө жакын арада иш-аракеттер көрүлөөрүн район акими белгилей кетти.
Андан сырткары Республикалык бюджеттин “Капиталдык салымдар” беренеси аркылуу каржыланып курулуп жаткан Лахол айылындагы спорт-комплекстин жана Жер-Көчкү айылындагы Б.Кыязов атындагы 150 орундуу орто мектептин курулуш иштери менен таанышты.
