Нарын районунун айыл аймактарында жаш өспүрүмдөргө карата зордук-зомбулукту, кылмыштуулукту, үй-бүлөлүк зомбулукту жана башка терс көрүнүштөрдү алдын алуу максатында түшүндүрүү иштери жүрүп жатат.Бул иш-чаралардын негизги максаты — жашы жете электерге карата зомбулукту, ырайымсыз мамилени, өспүрүмдөр арасындагы кылмыштуулукту, суицидди, рэкетчиликти, адам сатууну жана жыныстык кол тийбестикке жетүү учурларын алдын алуу.
Иш-чараны Нарын райондук мамлекеттик администрациясы, Нарын райондук ички иштер бөлүмүнүн милициянын көчмө кабылдамасы, билим берүү бөлүмү жана Пробация, медицина тармагы, Нарын райондор аралык эмгек, социалдык камсыздоо жана миграция башкармалыгы, КААПтын мүчөлөрү жана райондун имам-хатиби менен биргеликте жүргүзүлүүдө .
Нарын райондук Муса Баетов атындагы маданият үйү менен биргеликте ата-энелер жана мектеп окуучуларына “Бактылуу үй-бүлө” жана “Карынын кебин капка сал” темасында чакан театрлаштырылган сценкалар көрсөтүлүп, тарбиялык мааниси бар маалыматтар берилүүдө.
Бул аракеттердин баары жаштардын коопсуздугун камсыздоо, аларды коргоо жана коомдогу терс көрүнүштөргө каршы туруу максатында жүргүзүлүүдө.
