Бүгүн, 2025-жылдын 26-мартында администрациянын жыйындар залында Нарын райондук мамлекеттик администрациясынын башчысы-аким Н.Мадимаров, Нарын районунун прокурору Д.Суранбеков, акимдин орун басары Э.Жанболотова, райондук билим берүү бөлүмүнүн жетекчиси Г.Исакова жана жалпы билим берүү мекемелеринин жетекчилеринин катышуусунда жыйын өткөрүлдү.
Жыйында 2024-2025-окуу жылында өтүүчү жалпы республикалык тестирлөөгө жана республикалык олимпиадага даярдыктарды көрүү боюнча маселелер каралды.
Жыйындын жүрүшүндө жалпы республикалык тестирлөөгө (ЖРТ) даярдыкты күчөтүү жана окуучуларга ыңгайлуу мүмкүнчүлүктөрдү түзүү, сапаттуу даярдануусун камсыздоо максатында СЕКОМ, Агахан фонду, Салымбеков билим берүү борборлору менен биргеликте жер-жерлерде окуулар уюштурулуп жаткандыгы белгиленди.
Ошондой эле билим берүү борборлору менен тыгыз кызматташуу мындан ары да улантылып, окуучуларга ар тараптан колдоо көрсөтүлмөкчү.
Андан сырткары жыйындын жүрүшүндө Нарын районунун прокурору Д.Суранбеков тарабынан жаш өспүрүмдөр арасында кылмыштуулукту, рэкетчиликти алдын алуу чаралары, ата-энелер жана мугалимдер менен тыгыз иштешүүнүн маанилүүлүгү белгиленди.
