Бүгүн, 3-мартта Нарын районунун Дөбөлү айыл өкмөтүнө караштуу Таш-Башат айылында мамлекетибиздин эгемендүүлүгүн даңазалаган символикабыз болгон байрагыбыздын жана кыргыз элинин улуттук баш кийими “Ак калпак” күнүнө карата салтанаттуу иш-чара өткөрүлдү.
Иш-чарага Нарын райондук мамлекеттик администрациясынын башчысы-аким Н. Мадимаров, мекеме -ишкананын жетекчилери, айыл өкмөт башчылары катышты.
Алгач Кыргыз Республикасынын Гимни коюлуп, туу көтөрүлүп андан соң район акими сөз алып:
Мамлекеттик туу бул биздин улуттук сыймыгыбыз жана символубуз катарында ар бир кыргызстандыктын Ата мекенге болгон сүйүүсүн жана жоопкерчилигин ойготуп турат.
Туубуз ошондой эле эгемендүүлүктүн атрибуту катарында Кыргыз элинин биримдигин бекемдөө менен муундан-муунга татыктуу өткөрүлүп келет. Биздин ар бирибиздин ыйык милдетибиз аны көздүн карегиндей сактап, бийик көтөрүү.
Туу жана Ак калпак күнү – бул биздин улуттук символдорубузга арналган маанилүү күн. Бул күн Кыргызстанда улуттук биримдикти, маданиятты жана мекенге болгон сүйүүнү чыңдоого багытталган. Бул майрам биздин тарыхыбызды, салттарыбызды жана элдик баалуулуктарыбызды урматтоо үчүн жакшы мүмкүнчүлүк болуп саналат.
Элдин энчиси болгон эгемендигибиздин туусу бийикте желбиреп ак калпагыбыз башыбыздан түшпөй, эли жерибизде тынчтык, ынтымак жана өнүгүүлөр көп болуусун каалады.
Ылайым, ачык асман алдында мамлекеттик туубуз бийиктиктерде желбиреп, Кыргызстаныбыз өнүгө берсин!
Кийинки бөлүгү М.Баетов атындагы райондук маданият үйүнүн кызматкерлери, мектеп мугалимдери жана окуучулар тарабынан уюштурулган көркөм окуу, ыр бий аралаш концерттик программа менен коштолду.
Биздин эркин жана эгемен мамлекетибиздин туусу, дайыма бийиктикте желбиреп, көргөн жандын көз жоосун алып, мекенге болгон сүйүүнү арттырып, жакшы жетишкендикте, спорттук мелдештерде дүйнө жүзүнө даңаза болуп, бир желектин алдына бириккен элибизде биримдик, ынтымак болсун!!!
