Бүгүн, 19-мартта Нарын райондук мамлекеттик администрациясынын башчысы-аким Н.Мадимаров ДЭУ-8 Жол тейлөө мекемесинин жетекчиси К.Бейшеналиев, Дөбөлү айыл өкмөтүнүн башчысы К.Кудайбергенов, Чет-Нура айыл өкмөтүнүн башчысы А.Жумалиев жана Орук-Там, Тамды-Суу айылдарынын айыл башчылары менен биргеликте жарандардын коопсуздугун алдын алуу максатында жабылган Нарын-Орук-Там унаа жолунун “Капчыгай” участкасында түшкөн көчкүнү тазалоо жана жолду ачуу иштери менен жеринде таанышты.
Белгилей кетсек, жарандардын коопсуздугун камсыз кылуу жана ири материалдык чыгамдардын болбошуна жол бербөө, жаратылыш кырсыктарынын кесепеттерин алдын алуу максатында Нарын райондук мамлекеттик администрациясынын башчысы- аким Н.Мадимаровдун 2024-жылдын 14-ноябрындагы N390-б буйругу менен Нарын-Орук-Там унаа жолу убактылуу жабылган.
Учурда “Капчыгай” участкасындагы 51-61 чакырым аралыгында түшкөн кар көчкүлөрү ДЭУ-8 Жол тейлөө мекемесинин техникалары менен жолдорду ачуу иштери жүргүзүлүп, убакытты чектөө менен жол каттамы ачылды.
Нарын-Орук-Там унаа жолунун 51-61 чакырымы аба ырайы турукташканга чейин күндүзгү убакта, саат 11:00дөн-17:00 гө чейин каттамга чектөө киргизилген.
